الموضوعات الأكثر
ليلة البارح سرت بي هواجيسي شمال
بين سنفانٍ مهيبه.. وحزمٍ مستوي
في مراتع شرّد الصيد وخيار الحلال
يوم للبرق اشتعاله وللراعد دوي
وقمت أسج الفكر مابين هدنه وانفعال
ساعة أسوق البشاير وساعات أنزوي
وصار للذكرى القديمه على الصدر اجتوال
نجم يسطع في سماها ونجمين اتهوي
وقمت أسولف لاشهب اللال عن حلم الظلال
وفاض ماء العد السناوي على العد الروي
واعرضت قصة الحلم والنبع الزلال
وقامت ذياب المشاعر تقانب وتعوي
وقادني سلك المحبه على جسر الدلال
وقمت أجر الصوت والوجد يزويني زوي
ياوجودي كل ماهب نود وغصن مال
وجد من قضّى سنينه بلا ربع وخوي
في حرى شوفة مسيّر وفي رجوى تعال
منك ياللي مالكٍ مهجتي ملك جلوي
انت يانبض الحقيقه ويالرجم المحال
مااقتنعت اضما غيابك ولاني مرتوي
طاويٍ بعدك عروقي مثل طوي الحبال
وموثقٍ قلبي بحبك .. مواثيق بدوي
ليت للشاري على صدّة البايع مجال
والله إني لأفترشها على الضلع القوي
وكل مالاح بسماها من الذكرى هلال
وقام نجم سهيل تظهر وسومه ويهوي
سقت ذودي كل ماهب نسناس الشمال
مبعدٍ عن لجّة الناس مبغض وحموي
** **
- نايف المطيري