يا ناس ذاك البيت لا تهدمونه

خلّوه يبقى للمحبين تذكار

خلّوه حب سنين خلفه ودونه

في داخله قصه مواليف وأسرار

من يعشق الأطلال دمعه يخونه

لا صارت أقدامه على سكّة الدار

عش الحمام اللِّي بعالي ركونه

رمز الوفاء رمز المحبة والاصرار

إن جاء قبال البيت لا تعذلونه

خلّوه يبري علّته لو بالأنظار

راعي الهوى لا حب تبكي عيونه

لا هاجت الذكرى على ماضٍ صار

يا ما حلا الأيام كانت حنونه

يا ما حلى في مجلسه شبّة النار

كم عاشقٍ صابر وحرّك شجونه

عجايب الدنيا.. وميلات الأقدار

** **

- سعد الخريجي